Friday 12 April 2024
Friday 12 April 2024

 

Armin Laschet, i njohur si besniku i Merkelit fitoi garën për kryetar të partisë konservatore, CDU. Me 59 vjeçarin Laschet, CDU-ja pritet të vazhdojë kursin e qendrës.

 

Armin Laschet arriti në raundin final pas largimit të kandidatit të tretë nga gara, Norbert Röttgen, të marrë 521 vota kundër kandidatit Friedrich Merz që mori 466 vota. Gjithsej u dhanë 991 vota. Votimi pritet të zyrtarizohet pas votës digjitale në kongresin e CDU-së me votimin me postë. Ndër të tre kandidatët për postin e partisë CDU, Armin Laschet që nga viti 2017 është edhe kryeministër i landit Renani-Veriore Vestfali dhe konsiderohej si politikani që mbështeste më fort kursin e Angela Merkelit e që luftonte për një “CDU të qendrës”.

 

Pas zgjedhjes, Laschet falënderoi partinë e tij për besimin e madh. “Jam i vetëdijshëm për përgjegjësinë që është e lidhur me këtë post », tha ai në kongresin digjital të CDU-së. Tani bëhet fjalë që CDU të dalë mirë në zgjedhjet që do të zhvillohen pas “dy javësh”. Merz dhe Röttgen e uruan kryetarin e ri për zgjedhjen dhe po ashtu i uruan sukses në zgjedhjet parlamentare të këtij viti.

 

Para votimit, Laschet u shpreh në fjalën e tij të shtunën, se “CDU-ja, Gjermania që unë kam parasysh nuk ka nevojë për një CEO, por për një kapiten skuadre, që drejton dhe bashkon edhe një ekip, në të cilin të gjithë mund të mbështeten tek njëri-tjetri.”

 

Nga viti 2012 Laschet është një nga të pesë zëvendëskryetarët e partisë CDU. Katoliku nga zona e Rinit ka qenë gjithmonë partner i besueshëm i drejtuesit/es aktual/e të partisë. Deri në vitin 2018, Angela Merkel dhe pasuesja e saj Annegret Kramp-Karrenbauer mund të mbështeteshin tek zëvendëskryetari i partisë. Kur Merkeli në vitin 2015 u përball me stuhi politike në Gjermani për shkak të politikës ndaj refugjatëve, Laschet mbeti një nga shoqëruesit më besnikë dhe bashkëpunëtor i kancelares.

 

Maturi dhe politikë e qendrës

 

Sipas fjalëve të tij Laschet mbështet një politikë të matur dhe të qendrës, një politikë “që i drejtohet njerëzve dhe nuk u kthen kurrizin”. Ai bën thirrje për unitetin në shoqëri, paqen sociale, ekonominë e tregut. Laschet ishte i vetmi ndër tre kandidatët, që kishte fituar më parë një votim, dhe kishte përvojë qeverisjeje. Kjo me siguri “nuk të dëmton”, është shprehur ai.

 

Laschet që nga viti 2019 së bashku me ministrin e Shëndetësisë, Jens Spahn ka krijuar një ekip kandidature. Pak ditë para votimit ata paraqitën nën titullin “#Impulse2021″ një program 10 pikësh, ku theksojnë distancimin e qartë nga e djathta dhe shtrirjen e CDU-së si parti popullore me një krah të punëmarrësve me tendencë të majtë dhe një krah konservator të ekonomisë. Ata kanë formuluar pretendimin „t’i kthejnë vitet 20-të në një dekadë modernizimi për Gjermaninë: dinamikë të re ekonomike, siguri të gjerë, dhe shanse të mira dhe të drejta në arsim.” Laschet dhe Spahn duan të krijojnë një moratorium për ekonominë e goditur nga pandemia, një ministri të digjitalizimit në nivel federal dhe „tolerancë zero ndaj kriminalitetit dhe ekstremizmit”.

 

Europianë dhe transatlantikë

 

Në fushën e politikës së jashtme si Laschet edhe Spahn mbështesin një kurs proeuropian dhe transatlantik të qeverisë. Ata kërkojnë më shumë bashkëpunim me SHBA në drejtim të politikës tregtare dhe të klimës, kërkojnë një BE më të aftë në veprim dhe janë për një angazhim më të madh gjermano-francez. Laschet ka kontakte të ngushta me udhëheqjen politike në Paris dhe nga viti 2019 është edhe i ngarkuar i Gjermanisë për marrëdhëniet kulturore gjermano-franceze.

 

Laschet i lindur në Aachen e njeh mirë politikën. Para 30 vjetësh ai ka punuar si i ri në ekipin e presidentit të atëhershëm federal. Nga viti 1994-1998 juristi dhe gazetari u bë pjesë e Bundestagut, kurse nga viti 1999-2005 deputet i Parlamentit Europian. Nga viti 2010 Laschet është pjesë e parlamentit Renani-Veriore Vestfali. Aty ai arriti në vitin 2017 të fitojë zgjedhjet e landit dhe krijojë një koalicion me partinë, FDP. Krahas sukseseve, politikanit të CDU-së i është dashur të përballet edhe me dështime, Në vitin 1998 ai humbi mandatin e drejtpërdrejtë në Bundestag, dhe në vitin 2010 humbi përballë Norbert Röttgenit në konkurrencën për postin e kryetarit të CDU-së së landit. Tani 11 vite më vonë Laschet fiton në nivel federal. Armin Laschet mund të presë me durim.

 

Tani ai pason Angela Merkelin në krye të partisë, e kush e ka postin e kryetarit ka tradicionalisht edhe pretendimin për kandidaturën për kancelar. Nëse Laschet do të pasojë Angela Merkelin pas 15 vjetësh edhe në postin e kryetarit të qeverisë pas zgjedhjeve parlamentare më 26 shtator nuk është e vendosur ende. Çështja e kandidaturës për kancelar do të vendoset dy muaj më vonë, pas dy votimeve në dy lande dhe në ujdi me kryetarin e CSU-së, Markus Söder, që përflitet se ka edhe ambicie për postin e kancelarit. “Një kryeministër që udhëheq me sukses një vend 18 milionësh mund të jetë edhe kancelar”, tha Laschet para pak ditësh. Kursin e tij të ardhshëm ai e përmbledh me pak fjalë. “Një thyerje me Angela Merkelin do të ishte sinjali i gabuar.”

 

 

Më shumë

Merkeli më e preferuar se Macroni për të drejtuar Evropën

Mijëra qytetarë të BE e vlerësojnë Gjermaninë si përfaqësuese të besueshme të interesave të tyre. Evropianët, madje edhe francezët do ta preferonin Merkelin si lidere përpara presidentit Macron, shkruan Auron Dodi. Kandidatët për kancelarë në zgjedhjet parlamentare këtë vit në Gjermani mund të ëndërrojnë për kuotat e mbështetjes të kancelares Merkel. Në fund të […]

Konfuzion në lidhje me hyrjen e personave të vaksinuar në BE

Rregullat e hyrjes në BE për njerëzit e vaksinuar janë të pakuptueshme, sepse çdo shtet anëtar bën të vetën. Nevojë për sqarim ka edhe për Ballkanin.   Çertifikata e vaksinimit e BE që hyri në fuqi zyrtarisht në 1 korrik është një dokument, i cili supozohet se lehtëson udhëtimet brenda BE. Por atë mund […]

Francezët ndëshkojnë Macron, partia e presidentit pikiatë në zgjedhjet rajonale!

Francezët mbështeten konservatorët në raundin e parë të zgjedhjeve rajonale duke i nxjerrë ata fitues me votën e tyre, e duke renditur në vend të pestë partinë e presidentit Emmanuel Macron.   Konservatorët e shohin kështu shumë më real shansin për ta përmbysur Macronin vitin që vjen. Partia e ish presidentit, Sarkozy, Les Republicans […]

Cila do të jetë politika e jashtme gjermane nën një kancelar Armin Laschet?

Konservatori Laschet dëshiron ta zhvillojë Evropën me një bërthamë shtetesh vullnetare, të orientuara te Gjermania dhe Franca. Ai ka për ushtrinë, Kinën e Rusinë pikëpamje të ndryshme nga Të Gjelbrit, shkruan Auron Dodi. Fjalimi programatik i Armin Lashetit, kryetarit të partisë së kancelares Merkel, CDU dhe kandidatit për kancelar të CDU/CSU-së i drejtohej si […]

  • © 2017 Albanian Profile Të gjitha të drejtat e rezervuara